Sjetite se samo koliko vam prija kada ste u društvu neke osobe koja ima lijepe manire.

S druge strane, vjerovatno želite da budete što dalje od osobe koja se ponaša bahato, nepristojno i vrijeđa sve oko sebe. Učtivost je nešto što se uči od malih nogu. Jako je teško odraslu osobu naučiti lijepim manirima i ponašanju ako to nije prije svega posmatrala cio život, a zatim i učila kako da primjenjuje.

Mnogo je razloga zbog kojih je važno da djeca imaju lijepe manire. Mnogi od tih razloga su korisni po njih same, ali i vama mogu učiniti život ljepšim. Redovi koji slijede su tu da vam otkriju zašto su maniri važni kada su djeca u pitanju, kako biste još predanije mogli da radite na promovisanju lijepog ponašanja kod svoje djece.

Lijepi maniri njeguju brižnu prirodu djece

Prvi i osnovni razlog zbog kog je važno da djeca usvoje lijepe manire je svakako taj što oni njeguju brižnu prirodu djece. Ako želite da vaše dijete bude osjećajno i da zna kako da brine o drugima, važno je da ga naučite lijepim manirima. Kada vaše dijete postane svjesno da i drugi ljudi imaju osjećanja, želje, ciljeve i da se ne vrti sve oko njih, lakše će se snalaziti u svakodnevnim situacijama. Takođe, vi ćete primati komplimente koji vam poručuju da su vam djeca lijepo vaspitana.

Maniri djecu uče zahvalnosti

Jako je teško malo dijete naučiti da bude zahvalno za ono što ima i ono što dobija. Djeca nekako smatraju da sve što im se pruža zaslužuju i podrazumijevaju da će uvijek sve imati. Potrebno je mnogo truda i rada da dijete nekom uputi riječi zahvalnosti i da to zaista misli. Iskazivanje zahvalnosti je lekcija koju kada savladaju, ostaje uz njih tokom čitavog života.

Lijepi maniri sprečavaju dijete da bude razmaženo

Ako svoje dijete naučite lijepim manirima, isključujete mogućnost da bude razmaženo. Maniri nas uče da mislimo na druge, da ne uzimamo ništa i nikog zdravo za gotovo i da uz sposobnost izražavanja zahvalnosti vrednujemo ljude oko sebe. Razmažena djeca su ona koja nemaju tu sposobnost i koja misle da su centar svijeta. Lijepo ponašanje je ono koje se bori protiv toga.

Djeca sa lijepim manirima lakše stiču prijatelje

Učenje djeteta lijepom ponašanju je stepenik koji mu pomaže da lakše stiče prijatelje. Čak i djeca vole drugu djecu koja znaju lijepo da se ponašaju. Nisu maniri ti koji će djetetu da obezbijede prijatelje u životu već činjenica da je dijete ljubazno, dobronamjerno i da ima razumijevanja za drugu djecu.