Lider LDP Čedomir Jovanović rekao je jutros da je u srijedu uveče nakon incidenta ispred jednog restorana brze hrane na Novom Beogradu otišao u policiju kako bi dao izjavu.

On je za TV Prva rekao da je bacio stolicu u izlog lokala nedaleko od njegove kuće, nakon što su ga, kako je rekao, napali navijači.

“Sve je snimljeno, neka se gleda. Baš me briga šta pišu tabloidi, neka slave te huligane, ali se neću sklanjati s puta. Ovdje živim”, izjavio je.

Govoreći o incidentu, potvrdio je da je razbio izlog i naveo da ovaj atak nije prvi.

“Ovo nije prvi… Redovno me čekaju, kao i sinoć. Bacio sam stolicu u staklo, jesam. Jer oni samo taj jezik razumiju, nijedan drugi. Ovo je problem, a nije problem Beton hala… to ne može da očekuje od mene. Nisam došao kod njih, oni su došli kod mene. Nek me zaobizlaze na ulici, ne interesuje me. Da me nisu napali, ne bi bilo ničega”, istakao je Jovanović.

Kazao je da sada “ne zna da li će podnijeti prijavu” i ističe da nije kontaktirao advokata.